أهلاوي وأموت عشان الأهلي

رايح الاستاد أشجع الأهلي في ايدي علمي وصحبي بيندهلي


بضحك وماشي ولا علي بالي بهزر وعادي ولا هممني إ بعد كده الي هيجرالي

داخل الاستاد في وسط شتيمه وسباب وأول مادخلت قفلو الباب

شماريخ وصواريخ بتترمي عليا وانا في وسط ده محستش اني ضحيه

بشجع فرقتي بكل حماس ولا بيهمني كرامتي الي بتنداس المهم الأهلي يكسب وخلاص

بغني أغاني لفريقي حفظها من مده ومستمر في هتافي مهما طالت المده

رايح أشجع بكل طيبه ومسلم ومكنتش أعرف اني ممكن أتألم

شفت ناس جايه عليا وبتحدف طوب وصواريخ ولا حد في الدنيا حاسس بيا

وفي لحظه حسيت اني موش في الأرض انا في المريخ وشفت ناس في البلطجه ليهم تاريخ والآمن واقف كأنه جاي عشان يبيع بطيخ

قولت موش مهم طالما بشجع الأهلي وكل ده يهون عشان خاطر الأهلي وانا في كل ده صابر وعلي مهلي

خسرت ومالو بس قلبي فرحان عشان انا جيت وشجعت فريقي وفي قلبي حنان

شفت ناس مبطلتش شتيمه فيا وناس كتيره جايه عليا والامن واقف ولا حاسس بيا

انا الي طول عمري عشان بلدي متحمل الأسيه في الآخر اموت علي ايد بلطجيه والأمن سايبهم يقتلو فيا

بجري بحاول اهرب من ناس مسكالي سكين وبقولهم بصوت عالي هو احنا ولاد مين احنا ولاد بلدكم ولا احنا اسرائيليين

شفت صحبي بيقع من فوق المدرج ونبضه واقف وساكت مابتحرك ودموعي في عنيا موش قادر أتحرك

شفت 10 بيضربو واحد والكل عليه متاحد حتي بعد ما مات بيضربوه وقلبهم جاحد

جرينا مع بعض بنهرب من موتنا وبنلعن ام بلدنا الي جبتنا فجأه لقينا النور مضلم وفي وسطنا ناس علي وشها السيف معلم وببوص لقتهم ولاد حتتنا

بينا ناس ماتت كتير ولا في امن ولا في تقدير ده حتي الناس في قلوبها انعدم الضمير

بموت في وسط فريقي وبقول الشهاده وانا مع صديقي نجمي المفضل الي كنت اتمني أشوفه بين ايده بموت وحاسس ان ده موش حقيقي

مهما أنجرح مهما أموت بردو هشجع فريقي بأعلي صوت وعشان الأهلي كل شئ يفوت

اموت أموت ميهمنيش المهم فريقي يعيش وميتنسيش

عندأ مبدأ ووطنيه ولو كل الدنيا تهد فيا لأني صاحب حق وضمير أموت أموت عشان بلدي ولا يهمني أي واطي وحقير طالما انا في الجنه هلاقي المصير

احنا شاب الثوره والتغيير واقفين بندافع عن حق كل فقير ولا يهمنا أي خسيس وحقير ومهما يقتلو فينا برده هنفضل في التحرير ندافع عن ولاد بلدنا الي ماتو بإيد ناس معندهاش ضمير

ربنا يرحم شهدائنا سواء في استاد أو تحرير ويدخلهم الجنه انه علي كل شئ قدير